70 ਸਾਲਾਂ ਦੀ ਮਹਿੰਦਰ ਕੌਰ ਦਾ ਸੰਘਰਸ਼: ਰੇਹੜੀ ਉੱਪਰ ਸਬਜ਼ੀ ਵੇਚ ਕੇ ਕਰ ਰਹੀ ਗੁਜ਼ਾਰਾ

ਬਜ਼ੁਰਗ ਮਹਿਲਾ ਦੀ ਦਿਲ ਛੂਹਣ ਵਾਲੀ ਕਹਾਣੀ
ਧਨੌਲਾ (ਜ਼ਿਲ੍ਹਾ ਬਰਨਾਲਾ) ਦੀ ਰਹਿਣ ਵਾਲੀ 70 ਸਾਲਾਂ ਦੀ ਮਹਿੰਦਰ ਕੌਰ ਪਿਛਲੇ 25 ਸਾਲਾਂ ਤੋਂ ਰੇਹੜੀ ਉੱਪਰ ਸਬਜ਼ੀ ਵੇਚ ਕੇ ਆਪਣਾ ਗੁਜ਼ਾਰਾ ਕਰ ਰਹੇ ਹਨ। ਉਨ੍ਹਾਂ ਦੀ ਜ਼ਿੰਦਗੀ ਸੰਘਰਸ਼, ਹਿੰਮਤ ਅਤੇ ਆਤਮਨਿਰਭਰਤਾ ਦੀ ਜਿਉਂਦੀ ਮਿਸਾਲ ਹੈ। ਉਨ੍ਹਾਂ ਦੇ ਪਤੀ ਦੀ ਕੁਝ ਸਾਲ ਪਹਿਲਾਂ ਮੌਤ ਹੋ ਗਈ ਸੀ ਅਤੇ ਬੱਚਿਆਂ ਵੱਲੋਂ ਵੀ ਉਨ੍ਹਾਂ ਨੂੰ ਪੂਰਾ ਸਹਾਰਾ ਨਾ ਮਿਲਿਆ। ਇਸ ਹਾਲਤ ਵਿੱਚ ਮਹਿੰਦਰ ਕੌਰ ਨੇ ਕਿਸੇ ਅੱਗੇ ਹੱਥ ਫੈਲਾਉਣ ਦੀ ਬਜਾਏ ਆਪਣੀ ਮਿਹਨਤ ਨਾਲ ਜੀਵਨ ਬਿਤਾਉਣ ਦਾ ਫੈਸਲਾ ਕੀਤਾ।

ਸਵੇਰੇ 5 ਵਜੇ ਤੋਂ ਸ਼ੁਰੂ ਹੁੰਦਾ ਹੈ ਦਿਨ
ਮਹਿੰਦਰ ਕੌਰ ਦਾ ਦਿਨ ਸਵੇਰੇ 5 ਵਜੇ ਸ਼ੁਰੂ ਹੁੰਦਾ ਹੈ। ਉਹ ਬਰਨਾਲਾ ਦੀ ਸਬਜ਼ੀ ਮੰਡੀ ਤੋਂ ਸਬਜ਼ੀ ਖਰੀਦ ਕੇ ਲਿਆਉਂਦੀਆਂ ਹਨ। ਘਰ ਆ ਕੇ ਰੇਹੜੀ ਉੱਪਰ ਸਬਜ਼ੀ ਸਜਾਉਂਦੇ ਹਨ ਅਤੇ ਲਗਭਗ 10 ਵਜੇ ਧਨੌਲਾ ਦੀਆਂ ਗਲੀਆਂ ਵਿੱਚ ਸਬਜ਼ੀ ਵੇਚਣ ਲਈ ਚਲੇ ਜਾਂਦੇ ਹਨ।
ਦੁਪਹਿਰ ਸਮੇਂ ਕੁਝ ਸਮਾਂ ਆਰਾਮ ਕਰਕੇ ਉਹ ਦੁਬਾਰਾ 3 ਵਜੇ ਸਬਜ਼ੀ ਵੇਚਣ ਜਾਂਦੇ ਹਨ ਅਤੇ ਸ਼ਾਮ 7 ਵਜੇ ਘਰ ਵਾਪਸ ਆਉਂਦੇ ਹਨ। ਪੂਰਾ ਦਿਨ ਮਿਹਨਤ ਕਰਨ ਦੇ ਬਾਵਜੂਦ ਉਨ੍ਹਾਂ ਨੂੰ ਸਿਰਫ 300 ਤੋਂ 400 ਰੁਪਏ ਦੀ ਕਮਾਈ ਹੁੰਦੀ ਹੈ, ਜਿਸ ਨਾਲ ਘਰ ਦਾ ਗੁਜ਼ਾਰਾ ਕਰਨਾ ਬਹੁਤ ਮੁਸ਼ਕਿਲ ਹੈ।

ਬੱਚਿਆਂ ਤੋਂ ਉਮੀਦਾਂ ਅਤੇ ਹਕੀਕਤ
ਮਹਿੰਦਰ ਕੌਰ ਨੂੰ ਉਮੀਦ ਸੀ ਕਿ ਬੁਢਾਪੇ ਵਿੱਚ ਬੱਚੇ ਉਨ੍ਹਾਂ ਦਾ ਸਹਾਰਾ ਬਣਣਗੇ। ਪਰ ਵੱਡਾ ਪੁੱਤਰ ਅਲੱਗ ਰਹਿੰਦਾ ਹੈ। ਛੋਟਾ ਪੁੱਤਰ ਉਨ੍ਹਾਂ ਨਾਲ ਰਹਿੰਦਾ ਹੈ ਅਤੇ ਮਦਦ ਵੀ ਕਰਦਾ ਸੀ, ਪਰ ਇੱਕ ਸਾਲ ਪਹਿਲਾਂ ਉਸਦੇ ਸੱਟ ਲੱਗਣ ਕਾਰਨ ਉਹ ਵੀ ਘਰ ਹੀ ਬੈਠਾ ਹੈ। ਉਸਦੇ ਇਲਾਜ ਲਈ ਮਹਿੰਦਰ ਕੌਰ ਨੇ ਆਪਣੇ ਰਿਸ਼ਤੇਦਾਰਾਂ ਤੋਂ ਪੈਸੇ ਉਧਾਰ ਲਏ ਅਤੇ ਹੁਣ ਸਬਜ਼ੀ ਵੇਚ ਕੇ ਹੌਲੀ-ਹੌਲੀ ਕਰਜ਼ਾ ਵਾਪਸ ਕਰ ਰਹੇ ਹਨ।

70 ਸਾਲ ਦੀ ਉਮਰ ਵਿੱਚ ਵੀ ਹੌਸਲਾ ਕਾਇਮ
70 ਸਾਲ ਦੀ ਉਮਰ ਵਿੱਚ ਗਲੀਆਂ ਵਿੱਚ ਰੇਹੜੀ ਧੱਕਣਾ ਆਸਾਨ ਨਹੀਂ। ਸਰੀਰਕ ਤਕਲੀਫਾਂ ਵੀ ਆਉਂਦੀਆਂ ਹਨ, ਪਰ “ਢਿੱਡ ਦੀ ਅੱਗ” ਉਨ੍ਹਾਂ ਨੂੰ ਰੁਕਣ ਨਹੀਂ ਦਿੰਦੀ। ਮਹਿੰਦਰ ਕੌਰ ਕਹਿੰਦੀ ਹੈ ਕਿ ਭਾਵੇਂ ਇਸ ਉਮਰ ਵਿੱਚ ਕੰਮ ਕਰਨ ਨੂੰ ਮਨ ਨਹੀਂ ਕਰਦਾ ਪਰ ਘਰ ਦੇ ਗੁਜ਼ਾਰੇ ਲਈ ਓਹਨਾਂ ਨੂੰ ਸਭ ਕੁਝ ਸਹਿਣਾ ਪੈਂਦਾ ਹੈ। ਉਨ੍ਹਾਂ ਦੀ ਇਹ ਜੁਝਾਰੂ ਸੋਚ ਸਮਾਜ ਲਈ ਵੱਡੀ ਪ੍ਰੇਰਣਾ ਹੈ।

ਸਮਾਜ ਲਈ ਸਬਕ
ਮਹਿੰਦਰ ਕੌਰ ਦੀ ਕਹਾਣੀ ਸਾਨੂੰ ਇਹ ਸਿਖਾਉਂਦੀ ਹੈ ਕਿ ਹਾਲਾਤ ਕਿੰਨੇ ਵੀ ਮੁਸ਼ਕਿਲ ਕਿਉਂ ਨਾ ਹੋਣ, ਹਿੰਮਤ ਅਤੇ ਮਿਹਨਤ ਨਾਲ ਜੀਵਨ ਜਿਓਂ ਸਕਦੇ ਹਾਂ। ਉਹ ਬਜ਼ੁਰਗ ਮਹਿਲਾ ਹੋਣ ਦੇ ਬਾਵਜੂਦ ਕਿਸੇ ਉੱਤੇ ਨਿਰਭਰ ਨਹੀਂ ਹੋਈ ਅਤੇ ਆਪਣੀ ਮਿਹਨਤ ਨਾਲ ਆਪਣੀ ਪਛਾਣ ਬਣਾਈ।
ਹੇਠਾਂ ਦਿੱਤੀ ਵੀਡੀਓ ਵਿੱਚ ਤੁਸੀਂ ਮਹਿੰਦਰ ਕੌਰ ਦੇ ਸੰਘਰਸ਼ ਅਤੇ ਜੀਵਨ ਦੀਆਂ ਚੁਣੌਤੀਆਂ ਬਾਰੇ ਹੋਰ ਵਿਸਥਾਰ ਨਾਲ ਜਾਣ ਸਕਦੇ ਹੋ।