70 ਸਾਲ ਦੀ ਉਮਰ ਵਿੱਚ ਨਵੀਂ ਸ਼ੁਰੂਆਤ: ਮਹਿੰਦਰ ਕੌਰ ਨੇ ਦੁੱਖ ਨੂੰ ਤਾਕਤ ਬਣਾ ਕੇ ਖੋਲ੍ਹਿਆ ਢਾਬਾ

ਪੁੱਤਰ ਦੇ ਵਿਛੋੜੇ ਨੇ ਤੋੜ ਦਿੱਤਾ ਸੀ ਮਨ
ਅਕਸਰ 70 ਸਾਲ ਦੀ ਉਮਰ ਵਿੱਚ ਲੋਕ ਆਰਾਮ ਕਰਨ ਬਾਰੇ ਸੋਚਦੇ ਹਨ, ਪਰ ਮਹਿੰਦਰ ਕੌਰ ਨੇ ਇਸ ਉਮਰ ਵਿੱਚ ਇੱਕ ਨਵੀਂ ਮਿਸਾਲ ਕਾਇਮ ਕੀਤੀ ਹੈ। ਉਹ ਇੱਕ ਢਾਬਾ ਚਲਾ ਰਹੇ ਹਨ, ਪਰ ਇਸ ਦੇ ਪਿੱਛੇ ਕੋਈ ਆਰਥਿਕ ਮਜ਼ਬੂਰੀ ਨਹੀਂ ਹੈ। ਉਨ੍ਹਾਂ ਦਾ ਪਰਿਵਾਰ ਪੂਰੀ ਤਰ੍ਹਾਂ ਸੈਟਲ ਹੈ। ਉਨ੍ਹਾਂ ਦੇ ਪਤੀ, ਜੋ ਹੁਣ ਇਸ ਦੁਨੀਆ ਵਿੱਚ ਨਹੀਂ ਹਨ, ਇੱਕ ਸਰਪੰਚ ਸਨ ਅਤੇ ਪਰਿਵਾਰ ਕੋਲ ਚੰਗੀ-ਖਾਸੀ ਜ਼ਮੀਨ-ਜਾਇਦਾਦ ਵੀ ਹੈ। ਪਰ ਜ਼ਿੰਦਗੀ ਵਿੱਚ ਇੱਕ ਅਜਿਹਾ ਮੋੜ ਆਇਆ ਜਿਸ ਨੇ ਮਹਿੰਦਰ ਕੌਰ ਨੂੰ ਅੰਦਰੋਂ ਹਿਲਾ ਕੇ ਰੱਖ ਦਿੱਤਾ। ਉਨ੍ਹਾਂ ਦੇ ਵੱਡੇ ਪੁੱਤਰ ਦਾ ਦਿਹਾਂਤ ਹੋ ਗਿਆ, ਜਿਸ ਤੋਂ ਬਾਅਦ ਉਹ ਡਿਪ੍ਰੈਸ਼ਨ ਦਾ ਸ਼ਿਕਾਰ ਹੋ ਗਏ। ਇਸ ਦੁੱਖ ਕਾਰਨ ਉਨ੍ਹਾਂ ਦਾ ਸ਼ੂਗਰ ਲੈਵਲ ਵਧਣ ਲੱਗਾ ਅਤੇ ਦਿਲ ਦੀ ਬਿਮਾਰੀ ਵੀ ਹੋ ਗਈ।

ਪੋਤੀ ਦੀ ਸਲਾਹ ਨੇ ਬਦਲ ਦਿੱਤੀ ਜ਼ਿੰਦਗੀ
ਮਹਿੰਦਰ ਕੌਰ ਦੀ ਪੋਤੀ, ਜੋ ਕੈਨੇਡਾ ਵਿੱਚ ਰਹਿੰਦੀ ਹੈ, ਨੇ ਉਨ੍ਹਾਂ ਨੂੰ ਸਲਾਹ ਦਿੱਤੀ ਕਿ ਜੇਕਰ ਉਹ ਆਪਣੇ ਆਪ ਨੂੰ ਕਿਸੇ ਕੰਮ ਵਿੱਚ ਵਿਅਸਤ ਰੱਖਣਗੇ ਤਾਂ ਹੀ ਇਸ ਦੁੱਖ ਤੋਂ ਬਾਹਰ ਨਿਕਲ ਸਕਣਗੇ। ਪੋਤੀ ਦੀ ਇਹ ਗੱਲ ਮਹਿੰਦਰ ਕੌਰ ਦੇ ਦਿਲ ਨੂੰ ਛੂਹ ਗਈ। ਉਨ੍ਹਾਂ ਨੇ ਸੋਚਿਆ ਕਿ ਇਸ ਉਮਰ ਵਿੱਚ ਕੋਈ ਵੱਡਾ ਕੰਮ ਸ਼ੁਰੂ ਕਰਨਾ ਮੁਸ਼ਕਲ ਹੈ, ਪਰ ਉਨ੍ਹਾਂ ਨੇ ਆਪਣੀ ਪੂਰੀ ਜ਼ਿੰਦਗੀ ਰਸੋਈ ਵਿੱਚ ਬਿਤਾਈ ਸੀ। ਇਸ ਲਈ ਉਨ੍ਹਾਂ ਨੇ ਆਪਣੇ ਤਜਰਬੇ ਨੂੰ ਹੀ ਆਪਣੀ ਤਾਕਤ ਬਣਾਇਆ ਅਤੇ ਇੱਕ ਢਾਬਾ ਖੋਲ੍ਹਣ ਦਾ ਫੈਸਲਾ ਕਰ ਲਿਆ। ਮਹਿੰਦਰ ਕੌਰ ਦੇ ਢਾਬੇ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਹ ਹੈ ਕਿ ਇੱਥੇ ਸਾਰਾ ਕੰਮ ਔਰਤਾਂ ਕਰਦੀਆਂ ਹਨ। ਦਾਲ, ਸਬਜ਼ੀ ਅਤੇ ਰੋਟੀਆਂ ਅੱਜ ਵੀ ਰਵਾਇਤੀ ਤਰੀਕੇ ਨਾਲ ਚੁੱਲ੍ਹੇ ‘ਤੇ ਤਿਆਰ ਕੀਤੀਆਂ ਜਾਂਦੀਆਂ ਹਨ। ਇਸ ਕਾਰਨ ਢਾਬੇ ਦਾ ਖਾਣਾ ਲੋਕਾਂ ਨੂੰ ਘਰ ਦੇ ਖਾਣੇ ਵਰਗਾ ਸੁਆਦ ਦਿੰਦਾ ਹੈ। ਮਹਿੰਦਰ ਕੌਰ ਖੁਦ ਵੀ ਆਪਣੇ ਨਾਲ ਕੰਮ ਕਰਨ ਵਾਲੀਆਂ ਔਰਤਾਂ ਨਾਲ ਮੋਢੇ ਨਾਲ ਮੋਢਾ ਜੋੜ ਕੇ ਕੰਮ ਕਰਦੀਆਂ ਹਨ, ਜਿਸ ਨਾਲ ਉਹ ਸਰਗਰਮ ਰਹਿੰਦੀਆਂ ਹਨ ਅਤੇ ਉਨ੍ਹਾਂ ਦੀ ਸਿਹਤ ਵਿੱਚ ਵੀ ਕਾਫੀ ਫਰਕ ਆਇਆ ਹੈ।

ਗਰੀਬਾਂ ਅਤੇ ਮਰੀਜ਼ਾਂ ਦੀ ਸੇਵਾ
ਰਾਮਪੁਰਾ ਵਿੱਚ ਬਣੇ ਓਹਨਾਂ ਦੇ ਢਾਬੇ ਦੇ ਨੇੜੇ ਕੁਝ ਹਸਪਤਾਲ ਵੀ ਹਨ। ਜੇਕਰ ਕਿਸੇ ਮਰੀਜ਼ ਨੂੰ ਖ਼ਾਸ ਡਾਇਟ ਵਾਲੇ ਖਾਣੇ ਦੀ ਲੋੜ ਹੋਵੇ ਤਾਂ ਉਹ ਬਿਨਾਂ ਕਿਸੇ ਮੁੱਲ ਦੇ ਉਹ ਖਾਣਾ ਤਿਆਰ ਕਰਕੇ ਦੇ ਦਿੰਦੇ ਹਨ। ਇਸ ਤੋਂ ਇਲਾਵਾ, ਜੇਕਰ ਕੋਈ ਗਰੀਬ ਵਿਅਕਤੀ ਉਨ੍ਹਾਂ ਦੇ ਢਾਬੇ ‘ਤੇ ਆ ਜਾਂਦਾ ਹੈ ਤਾਂ ਉਹ ਉਸ ਨੂੰ ਵੀ ਮੁਫ਼ਤ ਰੋਟੀ ਖਵਾਉਂਦੇ ਹਨ। ਉਹ ਇਸ ਕੰਮ ਨੂੰ ਕਾਰੋਬਾਰ ਨਹੀਂ, ਸਗੋਂ ਸੇਵਾ ਅਤੇ ਪੁੰਨ ਦਾ ਕੰਮ ਮੰਨਦੇ ਹਨ।

ਔਰਤਾਂ ਲਈ ਬਣਿਆ ਰੋਜ਼ਗਾਰ ਦਾ ਸਾਧਨ
ਮਹਿੰਦਰ ਕੌਰ ਦੱਸਦੇ ਹਨ ਕਿ ਇਸ ਢਾਬੇ ਨੇ ਨਾ ਸਿਰਫ਼ ਉਨ੍ਹਾਂ ਦੀ ਜ਼ਿੰਦਗੀ ਵਿੱਚ ਖੁਸ਼ੀ ਵਾਪਸ ਲਿਆਈ ਹੈ, ਸਗੋਂ ਕਈ ਹੋਰ ਔਰਤਾਂ ਨੂੰ ਵੀ ਰੋਜ਼ਗਾਰ ਦਿੱਤਾ ਹੈ। ਉਨ੍ਹਾਂ ਨਾਲ ਕੰਮ ਕਰਨ ਵਾਲੀਆਂ ਮਹਿਲਾਵਾਂ ਹੁਣ ਆਪਣੇ ਪਰਿਵਾਰ ਦੀ ਆਰਥਿਕ ਮਦਦ ਕਰ ਰਹੀਆਂ ਹਨ ਅਤੇ ਆਪਣੇ ਘਰ ਦਾ ਚੁੱਲ੍ਹਾ ਚਲਾ ਰਹੀਆਂ ਹਨ। ਇਹ ਗੱਲ ਮਹਿੰਦਰ ਕੌਰ ਨੂੰ ਸਭ ਤੋਂ ਵੱਧ ਸੰਤੁਸ਼ਟੀ ਦਿੰਦੀ ਹੈ।

70 ਸਾਲ ਦੀ ਉਮਰ ਵਿੱਚ ਪ੍ਰੇਰਣਾਦਾਇਕ ਮਿਸਾਲ
ਮਹਿੰਦਰ ਕੌਰ ਸਵੇਰੇ 7 ਵਜੇ ਤੋਂ ਰਾਤ 10 ਵਜੇ ਤੱਕ ਆਪਣੇ ਢਾਬੇ ‘ਤੇ ਕੰਮ ਕਰਦੇ ਹਨ। ਉਹ ਕਹਿੰਦੇ ਹਨ ਕਿ ਉਨ੍ਹਾਂ ਨੇ ਇਹ ਕੰਮ ਪੈਸਾ ਕਮਾਉਣ ਲਈ ਨਹੀਂ, ਸਗੋਂ ਆਪਣੇ ਆਪ ਨੂੰ ਵਿਅਸਤ ਰੱਖਣ ਅਤੇ ਦੁੱਖ ਤੋਂ ਬਾਹਰ ਨਿਕਲਣ ਲਈ ਸ਼ੁਰੂ ਕੀਤਾ ਸੀ। ਅੱਜ ਉਨ੍ਹਾਂ ਦੀ ਸਿਹਤ ਪਹਿਲਾਂ ਨਾਲੋਂ ਬਿਹਤਰ ਹੈ ਅਤੇ ਉਹ ਆਪਣੇ ਕੰਮ ਨਾਲ ਖੁਸ਼ ਹਨ। ਮਹਿੰਦਰ ਕੌਰ ਦੀ ਕਹਾਣੀ ਸਾਬਤ ਕਰਦੀ ਹੈ ਕਿ ਉਮਰ ਕਦੇ ਵੀ ਨਵੀਂ ਸ਼ੁਰੂਆਤ ਕਰਨ ਵਿੱਚ ਰੁਕਾਵਟ ਨਹੀਂ ਬਣਦੀ। ਜੇਕਰ ਇਰਾਦੇ ਮਜ਼ਬੂਤ ਹੋਣ ਤਾਂ ਇਨਸਾਨ ਆਪਣੇ ਸਭ ਤੋਂ ਵੱਡੇ ਦੁੱਖ ਨੂੰ ਵੀ ਆਪਣੀ ਤਾਕਤ ਵਿੱਚ ਬਦਲ ਸਕਦਾ ਹੈ। ਉਨ੍ਹਾਂ ਦੇ ਕੰਮ ਬਾਰੇ ਹੋਰ ਜਾਨਣ ਲਈ ਦਿੱਤੇ ਤੁਸੀਂ ਹੇਠਾਂ ਦਿੱਤੀ ਵੀਡੀਓ ਵੇਖ ਸਕਦੇ ਹੋ।