ਮਾਨਸਾ ਦੇ ਖੋਖਰ ਕਲਾਂ ਦਾ ਨੌਜਵਾਨ ਬਣਿਆ ਹੋਰਨਾਂ ਲਈ ਪ੍ਰੇਰਣਾ

ਘੱਟ ਜ਼ਮੀਨ ਤੋਂ ਵੱਡਾ ਸੁਪਨਾ
ਜ਼ਿਲ੍ਹਾ ਮਾਨਸਾ ਦੇ ਪਿੰਡ ਖੋਖਰ ਕਲਾਂ ਦਾ ਰਹਿਣ ਵਾਲਾ ਨੌਜਵਾਨ ਬੱਬੂ ਸਿੰਘ ਇੱਕ ਛੋਟੇ ਕਿਸਾਨੀ ਪਰਿਵਾਰ ਨਾਲ ਸਬੰਧਿਤ ਹੈ। ਘਰ ਦੀ ਆਰਥਿਕ ਹਾਲਤ ਕਦੇ ਬਹੁਤ ਮਜ਼ਬੂਤ ਨਹੀਂ ਰਹੀ ਅਤੇ ਉਨ੍ਹਾਂ ਕੋਲ ਜ਼ਮੀਨ ਵੀ ਘੱਟ ਸੀ। ਪਰ ਕਹਿੰਦੇ ਹਨ ਕਿ ਜੇ ਇਰਾਦੇ ਮਜ਼ਬੂਤ ਹੋਣ ਤਾਂ ਘੱਟ ਸਰੋਤ ਵੀ ਕਾਮਯਾਬੀ ਦੀ ਰਾਹ ਬਣ ਸਕਦੇ ਹਨ। ਬੱਬੂ ਸਿੰਘ ਨੇ ਪੜਾਈ ਪੂਰੀ ਕਰਨ ਤੋਂ ਬਾਅਦ ਖੇਤੀਬਾੜੀ ਨੂੰ ਆਪਣਾ ਕਰੀਅਰ ਬਣਾਇਆ। ਉਹ ਆਪਣੀ ਥੋੜ੍ਹੀ ਜਿਹੀ ਜ਼ਮੀਨ ਉੱਤੇ ਵੱਖ-ਵੱਖ ਤਰ੍ਹਾਂ ਦੀਆਂ ਸਬਜ਼ੀਆਂ ਦੀ ਕਾਸਤ ਕਰਦੇ ਹਨ। ਉਹ ਮੰਡੀ ਵਿੱਚ ਫਸਲ ਵੇਚਣ ਦੀ ਬਜਾਏ ਸਿੱਧੇ ਗਾਹਕਾਂ ਨੂੰ ਵੇਚਣ ਨੂੰ ਤਰਜੀਹ ਦਿੰਦੇ ਹਨ, ਜਿਸ ਨਾਲ ਉਨ੍ਹਾਂ ਨੂੰ ਵਧੀਆ ਮੁਨਾਫਾ ਮਿਲਦਾ ਹੈ।

ਖੁਦ ਤੋੜ ਕੇ ਖੁਦ ਵੇਚਣ ਦਾ ਮਾਡਲ
ਬੱਬੂ ਸਿੰਘ ਦੀ ਖਾਸ ਗੱਲ ਇਹ ਹੈ ਕਿ ਉਹ ਸਿਰਫ ਸਬਜ਼ੀ ਉਗਾਉਂਦੇ ਹੀ ਨਹੀਂ, ਸਗੋਂ ਖੁਦ ਖੇਤ ਵਿੱਚੋਂ ਤੋੜਦੇ ਹਨ ਅਤੇ ਮੋਟਰਸਾਈਕਲ ਉੱਤੇ ਲੱਦ ਕੇ ਸ਼ਹਿਰ ਦੇ ਬਜ਼ਾਰ ਵਿੱਚ ਜਾ ਕੇ ਸੜਕ ਕਿਨਾਰੇ ਬੈਠ ਕੇ ਵੇਚਦੇ ਹਨ। ਉਹ ਦੱਸਦੇ ਹਨ ਕਿ ਉਨ੍ਹਾਂ ਦੀ ਸਬਜ਼ੀ ਹਮੇਸ਼ਾਂ ਤਾਜ਼ੀ ਹੁੰਦੀ ਹੈ, ਜਿਸ ਕਾਰਨ ਭਾਵੇਂ ਕੀਮਤ ਥੋੜ੍ਹੀ ਜ਼ਿਆਦਾ ਹੋਵੇ, ਪਰ ਇੱਕ ਵਾਰ ਖਰੀਦਣ ਵਾਲਾ ਗਾਹਕ ਮੁੜ ਮੁੜ ਉਨ੍ਹਾਂ ਕੋਲ ਆਉਂਦਾ ਹੈ। ਇਸ ਤਰ੍ਹਾਂ ਉਨ੍ਹਾਂ ਨੇ ਆਪਣਾ ਪੱਕਾ ਗਾਹਕ ਵਰਗ ਤਿਆਰ ਕਰ ਲਿਆ ਹੈ। ਘਰ ਦੀ ਮਾੜੀ ਆਰਥਿਕ ਹਾਲਤ ਤੋਂ ਸ਼ੁਰੂ ਕਰਕੇ ਅੱਜ ਉਹ ਆਪਣੀ ਮਿਹਨਤ ਨਾਲ ਨਾ ਸਿਰਫ ਚੰਗਾ ਘਰ ਤਿਆਰ ਕਰ ਚੁੱਕੇ ਹਨ, ਸਗੋਂ ਖੇਤੀ ਲਈ ਲੋੜੀਂਦੇ ਸੰਦ ਵੀ ਖਰੀਦ ਲਏ ਹਨ।

ਡੇਅਰੀ ਫਾਰਮਿੰਗ ਨਾਲ ਵਧੀ ਆਮਦਨ
ਸਬਜ਼ੀ ਕਾਸਤ ਤੋਂ ਇਲਾਵਾ ਬੱਬੂ ਸਿੰਘ ਡੇਅਰੀ ਫਾਰਮਿੰਗ ਵੀ ਕਰਦੇ ਹਨ। ਉਹ ਮੱਝਾਂ ਪਾਲਦੇ ਹਨ ਅਤੇ ਹਰ ਸਵੇਰੇ ਜਲਦੀ ਉੱਠ ਕੇ ਉਨ੍ਹਾਂ ਨੂੰ ਹਰਾ ਚਾਰਾ ਪਾਉਂਦੇ ਹਨ। ਉਨ੍ਹਾਂ ਦੀ ਮਾਤਾ ਮੱਝਾਂ ਦਾ ਦੁੱਧ ਚੌਂਦੀ ਹੈ ਅਤੇ ਬੱਬੂ ਸਿੰਘ ਖੁਦ ਸਵੇਰੇ ਲੋਕਾਂ ਦੇ ਘਰ ਜਾ ਕੇ ਦੁੱਧ ਸਪਲਾਈ ਕਰਦੇ ਹਨ। ਦਿਨ ਦਾ ਵੱਡਾ ਹਿੱਸਾ ਮਿਹਨਤ ਵਿੱਚ ਲੰਘਦਾ ਹੈ। ਸਵੇਰੇ ਦੁੱਧ ਸਪਲਾਈ ਕਰਨ ਤੋਂ ਬਾਅਦ ਉਹ ਖੇਤ ਵਿੱਚ ਸਬਜ਼ੀਆਂ ਤੋੜਣ ਜਾਂਦੇ ਹਨ।

ਸ਼ਾਮ 7 ਵਜੇ ਤੱਕ ਬਜ਼ਾਰ ਵਿੱਚ ਸਬਜ਼ੀ ਵੇਚਣ ਤੋਂ ਬਾਅਦ ਉਹ ਮੁੜ ਘਰ ਆ ਕੇ ਪਸ਼ੂਆਂ ਦੀ ਸਾਂਭ ਸੰਭਾਲ ਕਰਦੇ ਹਨ ਅਤੇ ਸ਼ਾਮ ਦੀ ਦੁੱਧ ਸਪਲਾਈ ਕਰਦੇ ਹਨ। ਇਸ ਤਰ੍ਹਾਂ ਖੇਤੀ ਅਤੇ ਡੇਅਰੀ ਫਾਰਮਿੰਗ ਦੇ ਸਾਂਝੇ ਮਾਡਲ ਨਾਲ ਉਹ ਆਪਣੀ ਆਮਦਨ ਨੂੰ ਸਥਿਰ ਬਣਾਉਣ ਵਿੱਚ ਕਾਮਯਾਬ ਰਹੇ ਹਨ।

ਵਿਦੇਸ਼ ਜਾਣ ਦੀ ਥਾਂ ਮਾਪਿਆਂ ਦੀ ਸੇਵਾ
ਬੱਬੂ ਸਿੰਘ ਦਾ ਛੋਟਾ ਭਰਾ ਵਿਦੇਸ਼ ਵਿੱਚ ਰਹਿੰਦਾ ਹੈ ਅਤੇ ਇੱਕ ਸਮੇਂ ਉਹ ਖੁਦ ਵੀ ਵਿਦੇਸ਼ ਜਾਣਾ ਚਾਹੁੰਦੇ ਸਨ। ਪਰ ਉਨ੍ਹਾਂ ਦੇ ਬਜ਼ੁਰਗ ਮਾਪਿਆਂ ਨੂੰ ਇੱਕਲਾ ਛੱਡਣਾ ਉਨ੍ਹਾਂ ਨੂੰ ਠੀਕ ਨਹੀਂ ਲੱਗਿਆ। ਉਨ੍ਹਾਂ ਨੇ ਫੈਸਲਾ ਕੀਤਾ ਕਿ ਉਹ ਆਪਣੇ ਮਾਪਿਆਂ ਦੇ ਕੋਲ ਰਹਿ ਕੇ ਹੀ ਮਿਹਨਤ ਕਰਨਗੇ ਅਤੇ ਆਪਣਾ ਕਾਰੋਬਾਰ ਵਧਾਉਣਗੇ। ਉਹ ਕਹਿੰਦੇ ਹਨ ਕਿ ਕਈ ਵਾਰ ਸੜਕ ਕਿਨਾਰੇ ਬੈਠ ਕੇ ਸਬਜ਼ੀ ਵੇਚਣ ਦੌਰਾਨ ਲੋਕ ਟਿੱਪਣੀਆਂ ਵੀ ਕਰਦੇ ਹਨ, ਪਰ ਉਹ ਕਦੇ ਵੀ ਇਨ੍ਹਾਂ ਗੱਲਾਂ ਦੀ ਪਰਵਾਹ ਨਹੀਂ ਕਰਦੇ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਆਪਣੇ ਕੰਮ ਵਿੱਚ ਕੋਈ ਵੀ ਝਿਜਕ ਜਾਂ ਸੰਗ ਨਹੀਂ ਹੋਣੀ ਚਾਹੀਦੀ।

ਨੌਜਵਾਨਾਂ ਲਈ ਪ੍ਰੇਰਣਾ
ਬੱਬੂ ਸਿੰਘ ਦੀ ਜ਼ਿੰਦਗੀ ਸਾਬਤ ਕਰਦੀ ਹੈ ਕਿ ਘੱਟ ਜ਼ਮੀਨ ਅਤੇ ਸੀਮਿਤ ਸਰੋਤ ਵੀ ਕਾਮਯਾਬੀ ਵਿੱਚ ਰੁਕਾਵਟ ਨਹੀਂ ਬਣਦੇ। ਸਹੀ ਯੋਜਨਾ, ਮਿਹਨਤ ਅਤੇ ਇਮਾਨਦਾਰੀ ਨਾਲ ਖੇਤੀਬਾੜੀ ਅਤੇ ਡੇਅਰੀ ਫਾਰਮਿੰਗ ਰਾਹੀਂ ਵਧੀਆ ਆਮਦਨ ਕਮਾਈ ਜਾ ਸਕਦੀ ਹੈ। ਉਨ੍ਹਾਂ ਦੀ ਇੱਕੋ ਇੱਛਾ ਹੈ ਕਿ ਉਹ ਆਪਣੇ ਮਾਪਿਆਂ ਦੀ ਸੇਵਾ ਕਰਦੇ ਹੋਏ ਆਪਣੇ ਪਸ਼ੂ ਪਾਲਣ ਦੇ ਕੰਮ ਨੂੰ ਹੋਰ ਵੱਡਾ ਕਰਨ ਅਤੇ ਹੋਰ ਨੌਜਵਾਨਾਂ ਲਈ ਮਿਸਾਲ ਬਣ ਸਕਣ। ਜੇ ਤੁਸੀਂ ਵੀ ਖੇਤੀਬਾੜੀ, ਸਬਜ਼ੀ ਕਾਸਤ ਜਾਂ ਡੇਅਰੀ ਫਾਰਮਿੰਗ ਵਿੱਚ ਦਿਲਚਸਪੀ ਰੱਖਦੇ ਹੋ, ਤਾਂ ਬੱਬੂ ਸਿੰਘ ਦੀ ਕਹਾਣੀ ਤੁਹਾਡੇ ਲਈ ਜਰੂਰ ਪ੍ਰੇਰਣਾਦਾਇਕ ਸਾਬਤ ਹੋਵੇਗੀ।