“ਕਰਮਾਂ ਆਲ਼ੀਆਂ” ਨੇ ਬਦਲੀ ਜ਼ਿੰਦਗੀ, ਬੱਕਰੀ ਪਾਲਣ ਨਾਲ ਗਰੀਬੀ ਤੋਂ ਕਾਮਯਾਬੀ ਤੱਕ ਦਾ ਸਫਰ

ਬਰਨਾਲਾ ਦੇ ਗੋਖਾ ਸਿੰਘ ਦੀ ਪ੍ਰੇਰਣਾਦਾਇਕ ਕਹਾਣੀ
ਪੰਜਾਬ ਦੇ ਬਰਨਾਲਾ ਜ਼ਿਲ੍ਹੇ ਦੇ ਕਸਬਾ ਤਪਾ ਦੇ ਰਹਿਣ ਵਾਲੇ ਗੋਖਾ ਸਿੰਘ ਬੱਕਰੀ ਪਾਲਣ ਦੇ ਕਿੱਤੇ ਨਾਲ ਜੁੜੇ ਹੋਏ ਹਨ। ਉਨ੍ਹਾਂ ਦੇ ਪਿਓ ਦਾਦੇ ਪਹਿਲਾਂ ਤੋਂ ਹੀ ਇਸ ਕਿੱਤੇ ਨਾਲ ਸੰਬੰਧਿਤ ਸਨ। ਘਰ ਦੀ ਆਰਥਿਕ ਹਾਲਤ ਕਮਜ਼ੋਰ ਹੋਣ ਕਰਕੇ ਉਹ ਪੜ੍ਹਾਈ ਨਹੀਂ ਕਰ ਸਕੇ ਅਤੇ ਛੋਟੀ ਉਮਰ ਤੋਂ ਹੀ ਆਪਣੇ ਪਿਤਾ ਪੁਰਖੀ ਕਿੱਤੇ ਨੂੰ ਅਪਣਾ ਲਿਆ। ਅੱਜ ਬੱਕਰੀ ਪਾਲਣ ‘ਚ ਕੀਤੀ ਮਿਹਨਤ ਨਾਲ ਉਹ ਨਾ ਸਿਰਫ ਆਪਣਾ ਘਰ ਚਲਾ ਰਹੇ ਹਨ, ਬਲਕਿ ਕਈ ਲੋਕਾਂ ਲਈ ਪ੍ਰੇਰਣਾ ਵੀ ਬਣ ਗਏ ਹਨ।

ਪਤਨੀ ਦੇ ਸਾਥ ਨਾਲ ਮਿਲੀ ਕਾਮਯਾਬੀ
ਗੋਖਾ ਸਿੰਘ ਦੱਸਦੇ ਹਨ ਕਿ ਉਨ੍ਹਾਂ ਦੀ ਪਤਨੀ ਅਮਨਦੀਪ ਕੌਰ ਨੇ ਵੀ ਇਸ ਕਿੱਤੇ ਵਿੱਚ ਪੂਰਾ ਸਾਥ ਦਿੱਤਾ ਹੈ। ਜਦੋਂ ਉਹ ਵਿਆਹ ਕੇ ਇਸ ਘਰ ਵਿੱਚ ਆਏ ਸਨ ਤਾਂ ਘਰ ਦੀ ਹਾਲਤ ਬਹੁਤ ਮਾੜੀ ਸੀ ਅਤੇ ਆਰਥਿਕ ਤੰਗੀ ਕਾਰਨ ਉਨ੍ਹਾਂ ਨੇ ਕਾਫੀ ਮੁਸ਼ਕਲ ਸਮਾਂ ਦੇਖਿਆ।
ਸ਼ੁਰੂਆਤੀ ਦਿਨਾਂ ਵਿੱਚ ਉਹ ਲੋਕਾਂ ਦੇ ਘਰ ਜਾ ਕੇ ਮਜ਼ਦੂਰੀ ਕਰਦੇ ਸਨ ਅਤੇ ਸ਼ਾਮ ਨੂੰ ਆਪਣੇ ਘਰ ਆ ਕੇ ਬੱਕਰੀਆਂ ਦੀ ਸਾਂਭ ਸੰਭਾਲ ਕਰਦੇ ਸਨ। ਹੌਲੀ-ਹੌਲੀ ਆਪਣੀ ਮਿਹਨਤ ਅਤੇ ਲਗਨ ਨਾਲ ਉਨ੍ਹਾਂ ਨੇ ਇਸ ਕਿੱਤੇ ਨੂੰ ਵੱਡਾ ਕੀਤਾ। ਅੱਜ ਉਨ੍ਹਾਂ ਕੋਲ ਲਗਭਗ 65 ਬੱਕਰੀਆਂ ਹਨ।

ਸਵੇਰੇ 4 ਵਜੇ ਤੋਂ ਸ਼ੁਰੂ ਹੁੰਦਾ ਹੈ ਦਿਨ
ਉਨ੍ਹਾਂ ਦਾ ਦਿਨ ਸਵੇਰੇ 4 ਵਜੇ ਤੋਂ ਸ਼ੁਰੂ ਹੋ ਜਾਂਦਾ ਹੈ। ਸਭ ਤੋਂ ਪਹਿਲਾਂ ਉਹ ਪਸ਼ੂਆਂ ਦੇ ਵਾੜੇ ਦੀ ਸਾਫ-ਸਫਾਈ ਕਰਦੇ ਹਨ। ਇਸ ਤੋਂ ਬਾਅਦ ਬੱਕਰੀਆਂ ਨੂੰ ਚਾਰਾ ਪਾਉਂਦੇ ਹਨ ਅਤੇ ਉਨ੍ਹਾਂ ਦੀ ਸੰਭਾਲ ਕਰਦੇ ਹਨ। ਉਹ ਖੁਦ ਹੀ ਬੱਕਰੀਆਂ ਦਾ ਦੁੱਧ ਕੱਢਦੇ ਹਨ ਅਤੇ ਇਸਨੂੰ ਡੇਅਰੀ ਵਿੱਚ ਪਾ ਕੇ ਆਉਂਦੇ ਹਨ। ਫਿਰ ਦੋਵੇਂ ਪਤੀ-ਪਤਨੀ ਬੱਕਰੀਆਂ ਨੂੰ ਬਾਹਰ ਚਰਾਉਣ ਲਈ ਲੈ ਕੇ ਜਾਂਦੇ ਹਨ। ਸ਼ਾਮ ਸਮੇਂ ਫਿਰ ਪਸ਼ੂਆਂ ਦੀ ਸੰਭਾਲ ਅਤੇ ਚਾਰੇ ਦੀ ਵਿਵਸਥਾ ਕਰਦੇ ਹਨ। ਇਸ ਤਰ੍ਹਾਂ ਉਨ੍ਹਾਂ ਦਾ ਪੂਰਾ ਦਿਨ ਬੱਕਰੀ ਪਾਲਣ ਦੇ ਕੰਮ ਵਿੱਚ ਹੀ ਬੀਤ ਜਾਂਦਾ ਹੈ।

ਲੋਕ ਮਜ਼ਾਕ ਵੀ ਉਡਾਉਂਦੇ ਸਨ
ਅਮਨਦੀਪ ਕੌਰ ਦੱਸਦੇ ਹਨ ਕਿ ਸ਼ੁਰੂਆਤੀ ਦਿਨਾਂ ਵਿੱਚ ਕਈ ਲੋਕ ਉਨ੍ਹਾਂ ਦਾ ਮਜ਼ਾਕ ਵੀ ਉਡਾਉਂਦੇ ਸਨ ਕਿਉਂਕਿ ਉਹ ਬੱਕਰੀ ਪਾਲਣ ਕਰਦੇ ਸਨ। ਪਰ ਉਨ੍ਹਾਂ ਨੇ ਕਿਸੇ ਦੀ ਗੱਲ ਦੀ ਪਰਵਾਹ ਨਹੀਂ ਕੀਤੀ ਅਤੇ ਆਪਣੇ ਕੰਮ ਵਿੱਚ ਲੱਗੇ ਰਹੇ। ਅੱਜ ਉਸੇ ਕਿੱਤੇ ਦੀ ਕਮਾਈ ਨਾਲ ਉਨ੍ਹਾਂ ਨੇ ਆਪਣਾ ਪੱਕਾ ਘਰ ਵੀ ਬਣਾਇਆ ਹੈ ਅਤੇ ਕਦੇ ਕਿਸੇ ਤੋਂ ਕਰਜ਼ਾ ਲੈਣ ਦੀ ਲੋੜ ਨਹੀਂ ਪਈ।

ਬੱਕਰੀ ਪਾਲਣ – ਇੱਕ ਤਰ੍ਹਾਂ ਦਾ ਨਕਦ ਕੈਸ਼
ਗੋਖਾ ਸਿੰਘ ਦੇ ਮੁਤਾਬਕ ਬੱਕਰੀ ਪਾਲਣ ਇੱਕ ਤਰ੍ਹਾਂ ਦਾ ਨਕਦ ਕੈਸ਼ ਹੈ। ਜਦੋਂ ਵੀ ਪੈਸਿਆਂ ਦੀ ਲੋੜ ਪੈਂਦੀ ਹੈ ਤਾਂ ਬੱਕਰੀ ਨੂੰ ਤੁਰੰਤ ਵੇਚ ਕੇ ਪੈਸੇ ਮਿਲ ਸਕਦੇ ਹਨ। ਉਹ ਕਹਿੰਦੇ ਹਨ ਕਿ ਕਿੱਤਾ ਕੋਈ ਵੀ ਮਾੜਾ ਨਹੀਂ ਹੁੰਦਾ, ਪਰ ਉਸ ਵਿੱਚੋਂ ਕਮਾਈ ਕਰਨ ਦਾ ਜਜ਼ਬਾ ਹੋਣਾ ਚਾਹੀਦਾ ਹੈ। ਮਿਹਨਤ ਅਤੇ ਲਗਨ ਨਾਲ ਬੱਕਰੀ ਪਾਲਣ ਵਿੱਚ ਵੀ ਚੰਗੀ ਕਮਾਈ ਕੀਤੀ ਜਾ ਸਕਦੀ ਹੈ।

“ਕਰਮਾਂ ਆਲ਼ੀਆਂ” ਨੇ ਬਦਲ ਦਿੱਤੀ ਜ਼ਿੰਦਗੀ
ਕਦੇ ਗਰੀਬੀ ਦਾ ਸਾਹਮਣਾ ਕਰਨ ਵਾਲੇ ਗੋਖਾ ਸਿੰਘ ਅੱਜ ਕਹਿੰਦੇ ਹਨ ਕਿ ਇਹ ਬੱਕਰੀਆਂ ਉਨ੍ਹਾਂ ਲਈ “ਕਰਮਾਂ ਆਲ਼ੀਆਂ” ਬਣ ਕੇ ਆਈਆਂ ਹਨ। ਇਨ੍ਹਾਂ ਦੀ ਬਦੌਲਤ ਹੀ ਉਨ੍ਹਾਂ ਦੀ ਜ਼ਿੰਦਗੀ ਬਦਲੀ ਹੈ। ਅੱਜ ਉਹ ਇਸ ਕਿੱਤੇ ਤੋਂ ਚੰਗੀ ਕਮਾਈ ਕਰ ਰਹੇ ਹਨ ਅਤੇ ਇਕ ਵਧੀਆ ਜ਼ਿੰਦਗੀ ਜੀ ਰਹੇ ਹਨ। ਗੋਖਾ ਸਿੰਘ ਨੇ ਸਿਰਫ ਆਪਣੀ ਗਰੀਬੀ ਨੂੰ ਦੂਰ ਨਹੀਂ ਕੀਤਾ, ਸਗੋਂ ਦੂਜੇ ਲੋਕਾਂ ਲਈ ਵੀ ਇੱਕ ਮਿਸਾਲ ਕਾਇਮ ਕੀਤੀ ਹੈ ਕਿ ਜੇ ਮਨ ਵਿੱਚ ਮਿਹਨਤ ਕਰਨ ਦਾ ਜਜ਼ਬਾ ਹੋਵੇ ਤਾਂ ਕੋਈ ਵੀ ਕਿੱਤਾ ਛੋਟਾ ਨਹੀਂ ਹੁੰਦਾ। ਉਨ੍ਹਾਂ ਦੀ ਮਿਹਨਤ ਅਤੇ ਜ਼ਿੰਦਗੀ ਦੇ ਸੰਘਰਸ਼ ਬਾਰੇ ਹੋਰ ਜਾਨਣ ਲਈ ਤੁਸੀਂ ਹੇਠਾਂ ਦਿੱਤੀ ਵੀਡੀਓ ਵੀ ਵੇਖ ਸਕਦੇ ਹੋ।