ਗਰੀਬੀ ਨਾਲ ਲੋਹਾ ਲੈ ਕੇ ਬਣਾਇਆ ਲੋਹੇ ਵਰਗਾ ਸਰੀਰ

ਲੁਧਿਆਣਾ ਜ਼ਿਲ੍ਹੇ ਦੇ ਪਿੰਡ ਕਾਉਂਕੇ ਦੇ ਰਹਿਣ ਵਾਲੇ ਨੌਜਵਾਨ ਹਰਵਿੰਦਰ ਸਿੰਘ ਕੈਲੀਸਥੈਨਿਕਸ ਖੇਡ ਖੇਡਦੇ ਹਨ। ਸਰੀਰਕ ਤੌਰ ‘ਤੇ ਜ਼ੋਰ ਮੰਗਣ ਵਾਲੀ ਇਸ ਖੇਡ ਨੂੰ ਕਰਨ ਲਈ ਮਹਿੰਗੇ ਫੂਡ ਸਪਲੀਮੈਂਟਸ ਦੀ ਲੋੜ ਪੈਂਦੀ ਹੈ ਪਰ ਹਰਵਿੰਦਰ ਨੇ ਬਿਨਾਂ ਕਿਸੇ ਮਹਿੰਗੇ ਫੂਡ ਸਪਲੀਮੈਂਟ ਦੀ ਵਰਤੋਂ ਕਰਕੇ ਆਪਣੇ ਸਰੀਰ ਨੂੰ ਮਜ਼ਬੂਤ ਬਣਾਇਆ ਹੈ।

ਹਰਵਿੰਦਰ ਸਿੰਘ ਦੱਸਦਾ ਹੈ ਕਿ ਬਚਪਨ ਵਿੱਚ ਹੀ ਉਸਦੀ ਮਾਤਾ ਦੀ ਮੌਤ ਹੋ ਗਈ ਸੀ ਅਤੇ ਉਸਦੇ ਪਿਤਾ ਨੇ ਉਸਦਾ ਪਾਲਣ ਪੋਸ਼ਣ ਕੀਤਾ ਹੈ। ਉਹ ਹਰ ਰੋਜ਼ ਸਵੇਰੇ ਘਰ ਦੇ ਕੰਮ ਨਬੇੜ ਕੇ ਪਿੰਡ ਦੇ ਗਰਾਊਂਡ ਜਾਂਦਾ ਹੈ ਜਿੱਥੇ ਉਹ ਸਰੀਰਕ ਕਸਰਤ ਦੇ ਨਾਲ-ਨਾਲ ਘੰਟਿਆਂ ਤੱਕ ਕੈਲੀਸਥੈਨਿਕਸ ਦਾ ਅਭਿਆਸ ਕਰਦੇ ਹਨ।

ਪਰਿਵਾਰ ਦੀ ਗਰੀਬੀ ਕਾਰਨ ਉਹ ਮਹਿੰਗੇ ਫੂਡ ਸਪਲੀਮੈਂਟ ਨਹੀਂ ਖਰੀਦ ਸਕੇ ਪਰ ਓਹਨਾਂ ਨੇ ਆਪਣੇ ਜਨੂੰਨ ਦੇ ਦਮ ‘ਤੇ ਇਸ ਖੇਡ ‘ਚ ਆਪਣਾ ਨਾਂ ਬਣਾਇਆ ਹੈ। ਹਰਵਿੰਦਰ ਕੈਲੀਸਥੈਨਿਕਸ ਖੇਡ ਦੇ ਆਪਣੇ ਹੁਨਰ ਦੀਆਂ ਕਈ ਵੀਡੀਓਜ਼ ਸੋਸ਼ਲ ਮੀਡੀਆ ‘ਤੇ ਅਪਲੋਡ ਵੀ ਕਰਦੇ ਹਨ ਜੋ ਕਾਫੀ ਵਾਇਰਲ ਵੀ ਹੋਈਆਂ ਹਨ।

ਹਰਵਿੰਦਰ ਸਿੰਘ ਨੇ ਨੌਜਵਾਨਾਂ ਨੂੰ ਅਪੀਲ ਵੀ ਕੀਤੀ ਕਿ ਨਸ਼ੇ ਜਿਹੀਆਂ ਭੈੜੀਆਂ ਅਲਾਮਤਾਂ ਵਿੱਚ ਪੈਣ ਦੀ ਬਜਾਏ ਨੌਜਵਾਨਾਂ ਨੂੰ ਆਪਣੇ ਸਰੀਰ ਵੱਲ ਵੀ ਧਿਆਨ ਦੇਣਾ ਚਾਹੀਦਾ ਹੈ। ਹਰਵਿੰਦਰ ਦੇ ਸੰਘਰਸ਼ ਅਤੇ ਪ੍ਰਾਪਤੀਆਂ ਬਾਰੇ ਹੋਰ ਜਾਨਣ ਲਈ ਹੇਠਾਂ ਦਿੱਤੀ ਵੀਡੀਓ ਵੇਖ ਸਕਦੇ ਹੋ।