72 ਸਾਲ ਦੀ ਉਮਰ ਵਿੱਚ ਝੋਟੇ ਪਾਲਣ ਨਾਲ ਚੰਗੀ ਕਮਾਈ ਕਰ ਰਹੇ ਮਾਮੂ ਜਵੰਧਾ

ਜ਼ਿਲ੍ਹਾ ਲੁਧਿਆਣਾ ਦੇ ਪਿੰਡ ਰਸੂਲਪੁਰ ਮੱਲਾ ਦੇ ਰਹਿਣ ਵਾਲੇ ਮਾਮੂ ਜਵੰਧਾ ਨੇ 72 ਸਾਲ ਦੀ ਉਮਰ ਵਿੱਚ ਵੀ ਆਪਣੀ ਮਿਹਨਤ ਅਤੇ ਤਜਰਬੇ ਨਾਲ ਇਹ ਸਾਬਤ ਕਰ ਦਿੱਤਾ ਹੈ ਕਿ ਜੇਕਰ ਇਰਾਦੇ ਮਜ਼ਬੂਤ ਹੋਣ ਤਾਂ ਕਿਸੇ ਵੀ ਉਮਰ ਵਿੱਚ ਕਾਮਯਾਬੀ ਹਾਸਲ ਕੀਤੀ ਜਾ ਸਕਦੀ ਹੈ। ਝੋਟੇ ਪਾਲਣ ਦਾ ਕੰਮ ਕਰਦੇ ਹੋਏ ਉਹ ਅੱਜ ਨਾ ਸਿਰਫ਼ ਚੰਗੀ ਕਮਾਈ ਕਰ ਰਹੇ ਹਨ, ਸਗੋਂ ਪੂਰੇ ਇਲਾਕੇ ਵਿੱਚ ਆਪਣੀ ਵੱਖਰੀ ਪਹਚਾਣ ਵੀ ਬਣਾ ਚੁੱਕੇ ਹਨ।

ਬਚਪਨ ਤੋਂ ਜਾਨਵਰ ਪਾਲਣ ਦਾ ਸ਼ੌਂਕ
ਮਾਮੂ ਜਵੰਧਾ ਦੱਸਦੇ ਹਨ ਕਿ ਉਨ੍ਹਾਂ ਨੂੰ ਬਚਪਨ ਤੋਂ ਹੀ ਪਸ਼ੂ ਪਾਲਣ ਦਾ ਬਹੁਤ ਸ਼ੌਂਕ ਸੀ। ਸਮੇਂ ਦੇ ਨਾਲ ਇਹ ਸ਼ੌਂਕ ਉਨ੍ਹਾਂ ਦਾ ਪੇਸ਼ਾ ਬਣ ਗਿਆ। ਅੱਜ ਉਹ ਪਿਛਲੇ ਕਈ ਸਾਲਾਂ ਤੋਂ ਝੋਟੇ ਪਾਲਣ ਦਾ ਕੰਮ ਕਰ ਰਹੇ ਹਨ ਅਤੇ ਇਸ ਵਿੱਚ ਕਾਫੀ ਤਜਰਬਾ ਹਾਸਲ ਕਰ ਚੁੱਕੇ ਹਨ। 72 ਸਾਲ ਦੀ ਉਮਰ ਵਿੱਚ ਵੀ ਉਹ ਖੁਦ ਪਸ਼ੂਆਂ ਦੀ ਸੰਭਾਲ ਕਰਦੇ ਹਨ, ਜੋ ਉਨ੍ਹਾਂ ਦੀ ਲਗਨ ਅਤੇ ਮਿਹਨਤ ਨੂੰ ਦਰਸਾਉਂਦਾ ਹੈ।
ਨੀਲੀ ਰਾਵੀ ਅਤੇ ਬੂਰੀ ਨਸਲ ਦੇ ਝੋਟੇ
ਉਨ੍ਹਾਂ ਕੋਲ ਇਸ ਵੇਲੇ ਨੀਲੀ ਰਾਵੀ ਅਤੇ ਬੂਰੀ ਨਸਲ ਦੇ ਦੋ ਝੋਟੇ ਹਨ। ਚੰਗੀ ਨਸਲ ਦੀ ਪਹਿਚਾਣ ਵਿੱਚ ਮਾਮੂ ਜਵੰਧਾ ਨੂੰ ਖਾਸ ਮੁਹਾਰਤ ਹਾਸਲ ਹੈ। ਨੇੜਲੇ ਕਈ ਪਿੰਡਾਂ ਵਿੱਚ ਉਨ੍ਹਾਂ ਦਾ ਨਾਮ ਇੱਜ਼ਤ ਨਾਲ ਲਿਆ ਜਾਂਦਾ ਹੈ ਕਿਉਂਕਿ ਉਹ ਵਧੀਆ ਨਸਲ ਦੇ ਝੋਟੇ ਤਿਆਰ ਕਰਦੇ ਹਨ।

25 ਹਜ਼ਾਰ ਤੋਂ 3 ਲੱਖ ਤੱਕ – ਕਮਾਈ ਦਾ ਮਾਡਲ
ਮਾਮੂ ਜਵੰਧਾ ਦੱਸਦੇ ਹਨ ਕਿ ਉਹ ਇੱਕ ਵਧੀਆ ਨਸਲ ਦਾ ਕੱਟਾ ਲਗਭਗ 25 ਹਜ਼ਾਰ ਰੁਪਏ ਵਿੱਚ ਖਰੀਦਦੇ ਹਨ। ਉਸਦੀ ਸਹੀ ਦੇਖਭਾਲ, ਖੁਰਾਕ ਅਤੇ ਸਿਹਤ ‘ਤੇ ਧਿਆਨ ਦੇ ਕੇ ਤਿੰਨ ਸਾਲਾਂ ਵਿੱਚ ਉਹੀ ਕੱਟਾ ਲਗਭਗ ਤਿੰਨ ਲੱਖ ਰੁਪਏ ਤੱਕ ਵੇਚਿਆ ਜਾਂਦਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਚੰਗੀ ਨਸਲ ਦਾ ਝੋਟਾ ਸੋਨੇ ਦੀ ਮੁੰਦਰੀ ਦੇ ਬਰਾਬਰ ਹੈ। ਜਦੋਂ ਵੀ ਪੈਸਿਆਂ ਦੀ ਲੋੜ ਪਵੇ, ਇਸਨੂੰ ਵੇਚ ਕੇ ਤੁਰੰਤ ਕਮਾਈ ਕੀਤੀ ਜਾ ਸਕਦੀ ਹੈ। ਇਹ ਕਾਰੋਬਾਰ ਘੱਟ ਜੋਖਮ ਅਤੇ ਵਧੀਆ ਮੁਨਾਫੇ ਵਾਲਾ ਸਾਬਤ ਹੋ ਸਕਦਾ ਹੈ।
ਮੱਝ ਪਾਲਣ ਨਾਲੋਂ ਝੋਟੇ ਪਾਲਣਾ ਕਿਉਂ ਵਧੀਆ?
ਮਾਮੂ ਜਵੰਧਾ ਦੇ ਅਨੁਸਾਰ ਮੱਝ ਪਾਲਣ ਨਾਲੋਂ ਝੋਟੇ ਪਾਲਣ ਵਿੱਚ ਵਧੇਰੇ ਫਾਇਦਾ ਹੈ। ਮੱਝਾਂ ਨੂੰ ਅਕਸਰ ਵੱਖ-ਵੱਖ ਬਿਮਾਰੀਆਂ ਲੱਗ ਜਾਂਦੀਆਂ ਹਨ, ਜਿਨ੍ਹਾਂ ਕਾਰਨ ਵੱਧ ਖਰਚੇ ਅਤੇ ਸੰਭਾਲ ਦੀ ਲੋੜ ਪੈਂਦੀ ਹੈ। ਦੂਜੇ ਪਾਸੇ, ਜੇਕਰ ਝੋਟੇ ਦੀ ਸਹੀ ਦੇਖਭਾਲ ਕੀਤੀ ਜਾਵੇ ਤਾਂ ਉਹ ਕਾਫੀ ਘੱਟ ਬਿਮਾਰ ਹੁੰਦਾ ਹੈ। ਇਸ ਕਰਕੇ ਖਰਚਾ ਵੀ ਘੱਟ ਹੁੰਦਾ ਹੈ ਅਤੇ ਨਫਾ ਵਧਦਾ ਹੈ।

ਦੇਸੀ ਨੁਸਖਿਆਂ ਨਾਲ ਪਸ਼ੂਆਂ ਦਾ ਇਲਾਜ
ਮਾਮੂ ਜਵੰਧਾ ਨੂੰ ਪਸ਼ੂਆਂ ਦੇ ਇਲਾਜ ਵਿੱਚ ਵੀ ਕਾਫੀ ਤਜਰਬਾ ਹੈ। ਉਹ ਦੱਸਦੇ ਹਨ ਕਿ ਮੱਝ ਦੇ ਭਾਰ ਪੈਣ, ਔਲ਼ਾ ਪੈਣ ਜਾਂ ਹੋਰ ਸਮੱਸਿਆਵਾਂ ਦਾ ਇਲਾਜ ਉਹ ਖੁਦ ਕਰ ਲੈਂਦੇ ਹਨ। ਕਈ ਵਾਰ ਅਜਿਹੇ ਮਾਮਲੇ ਵੀ ਆ ਜਾਂਦੇ ਹਨ ਜਿੱਥੇ ਡਾਕਟਰ ਵੀ ਹੱਥ ਖੜੇ ਕਰ ਦੇਂਦੇ ਹਨ, ਪਰ ਉਹ ਆਪਣੇ ਦੇਸੀ ਨੁਸਖਿਆਂ ਅਤੇ ਤਜਰਬੇ ਨਾਲ ਪਸ਼ੂਆਂ ਨੂੰ ਠੀਕ ਕਰ ਦਿੰਦੇ ਹਨ। ਇਸੇ ਕਰਕੇ ਦੂਰ-ਦੂਰ ਤੋਂ ਲੋਕ ਆਪਣੇ ਪਸ਼ੂਆਂ ਦਾ ਇਲਾਜ ਕਰਵਾਉਣ ਲਈ ਉਨ੍ਹਾਂ ਕੋਲ ਆਉਂਦੇ ਹਨ ਅਤੇ ਪੂਰੇ ਪੰਜਾਬ ਵਿੱਚ ਉਹ ਜਾਣੇ ਜਾਂਦੇ ਹਨ।
ਝੋਟਿਆਂ ਦੀ ਖੁਰਾਕ – ਕਾਮਯਾਬੀ ਦਾ ਰਾਜ਼
ਚੰਗੀ ਨਸਲ ਦੇ ਝੋਟੇ ਤਿਆਰ ਕਰਨ ਲਈ ਖੁਰਾਕ ਸਭ ਤੋਂ ਜ਼ਰੂਰੀ ਹਿੱਸਾ ਹੈ। ਮਾਮੂ ਜਵੰਧਾ ਆਪਣੇ ਪਸ਼ੂਆਂ ਨੂੰ ਖਲ, ਦਾਣਾ, ਬਾਜਰਾ, ਛੋਲੇ, ਗੁੜ ਅਤੇ ਚੌਕਰ ਤਾਂ ਪਾਉਂਦੇ ਹੀ ਹਨ। ਇਸਦੇ ਨਾਲ-ਨਾਲ ਹਰੇ ਚਾਰੇ ਵਜੋਂ ਦੇਸੀ ਘਾਹ ਵੀ ਜ਼ਰੂਰ ਦਿੰਦੇ ਹਨ। ਉਹ ਖੁਦ ਖੇਤਾਂ ਅਤੇ ਸੜਕਾਂ ਦੇ ਕਿਨਾਰਿਆਂ ਤੋਂ ਹਰਾ ਘਾਹ ਵੱਢ ਕੇ ਲਿਆਉਂਦੇ ਹਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਕੁਦਰਤੀ ਖੁਰਾਕ ਪਸ਼ੂਆਂ ਦੀ ਸਿਹਤ ਅਤੇ ਤਾਕਤ ਲਈ ਬਹੁਤ ਲਾਭਦਾਇਕ ਹੁੰਦੀ ਹੈ।

ਨਵੇਂ ਨੌਜਵਾਨਾਂ ਲਈ ਸੁਨੇਹਾ
ਮਾਮੂ ਜਵੰਧਾ ਕਹਿੰਦੇ ਹਨ ਕਿ ਜੇਕਰ ਕੋਈ ਨੌਜਵਾਨ ਚੰਗੀ ਨਸਲ ਦੇ ਕੱਟੇ ਪਾਲ ਕੇ ਝੋਟੇ ਤਿਆਰ ਕਰਨ ਦਾ ਕੰਮ ਸ਼ੁਰੂ ਕਰਨਾ ਚਾਹੁੰਦਾ ਹੈ ਤਾਂ ਉਸਨੂੰ ਸ਼ੁਰੂ ਵਿੱਚ ਮਿਹਨਤ ਜਰੂਰ ਕਰਨੀ ਪਵੇਗੀ। ਪਰ ਜੇਕਰ ਸਹੀ ਤਰੀਕੇ ਨਾਲ ਕੰਮ ਕੀਤਾ ਜਾਵੇ ਤਾਂ ਇਸ ਵਿੱਚੋਂ ਵਧੀਆ ਕਮਾਈ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਦੀ ਕਹਾਣੀ ਇਹ ਸਿੱਖਾਉਂਦੀ ਹੈ ਕਿ ਖੇਤੀਬਾੜੀ ਅਤੇ ਪਸ਼ੂ ਪਾਲਣ ਦੇ ਖੇਤਰ ਵਿੱਚ ਅਜੇ ਵੀ ਬੇਅੰਤ ਮੌਕੇ ਮੌਜੂਦ ਹਨ। ਸਿਰਫ਼ ਲੋੜ ਹੈ ਸਹੀ ਦਿਸ਼ਾ, ਮਿਹਨਤ ਅਤੇ ਲਗਨ ਦੀ। ਉਨ੍ਹਾਂ ਬਾਰੇ ਹੋਰ ਜਾਨਣ ਲਈ ਤੁਸੀਂ ਹੇਠਾਂ ਦਿੱਤੀ ਵੀਡੀਓ ਵੇਖ ਸਕਦੇ ਹੋ।